രാവിലെ കുളിച്ചൊരുങ്ങി പുറത്തിറങ്ങുമ്പോൾ മുതൽ വൈകിട്ട് വീട്ടിൽ തിരിച്ചെത്തുമ്പോൾ വരെ മലയാളി കണ്ടു കൊണ്ടിരിക്കുന്ന ഒരു സംഭവം ഉണ്ട് ,പണ്ടൊക്കെ ആയിരുന്നെങ്കിൽ തെങ്ങ് എന്ന് പറയാരുന്നു .ഇന്ന് ഉത്തരം ഫ്ലക്സ് ബോർഡ് .നാട്ടിൽ കുട്ടിയുണ്ടാകുന്നത് മുതൽ ജനനം ,മരണം, അടിയന്തിരം തുടങ്ങി ഒന്ന് തുമ്മിയാൽ പോലും ഫ്ലക്സ് ബോർഡ് വെക്കുന്ന അവസ്ഥയായി .എന്തുകൊണ്ടാണ് നാട്ടിൽ മുഴുവൻ ഇങ്ങനെ ഫ്ലക്സ് ബോർഡ് വന്നത് .എതാണ്ട് 5 വർഷങ്ങൾക്കുള്ളിൽ ഫ്ലക്സ് നാടെങ്ങും പടര്ന്നു പന്തലിച്ചു നില്ക്കുന്നു .
ടെക്നോളജിയുടെ വളർച്ച ആദ്യം ഉപകാരവും ,പിന്നെ ഉപദ്രവവും ആകും എന്നതിന് വലിയ ഒരു ഉദാഹരണമാണ് ഫ്ലക്സ് ബോർഡ് .പണ്ട് തുണികൊണ്ടും ,കടലാസ് കൊണ്ടും ,നിർമിച്ചിരുന്ന പരസ്യപ്പലകകളും ,ബാനറുകളും ഇന്ന് ഫ്ലക്സിനു വഴിമാറിയിരിക്കുന്നു .വളരെപ്പെട്ടന്ന് തയ്യാറാക്കാം എന്നതാണ് ഇതിന്റെ പ്രത്യേകത .ചിലവും വളരെ കുറവാണ് .ബഹുവിധ വർണങ്ങളിൽ നിർമ്മിക്കാം . പഴയകാലത്തെ അപേക്ഷിച്ച് ഇന്ന് എല്ലാത്തിനും സ്വന്തമായി പ്രചാരണം കൊടുക്കുന്ന കാലമാണ് .ഏതെങ്കിലും ഒരു രാഷ്ട്രീയ പാർടിയിൽ ഒരു രൂപ മെമ്പര്ഷിപ്പ് എടുത്താലും അതിനും വെക്കും ഫ്ലക്സ് .ഓരോ രാഷ്ട്രീയ പാർട്ടിയും ഫ്ലക്സ് വെക്കുന്ന കാശ് ഇവിടുത്തെ പാവപ്പെട്ട ആളുകൾക്ക് ഒരു നേരത്തെ ഭക്ഷണത്തിന് കൊടുത്തിരുന്നെങ്കിൽ രാജ്യം എന്നെ ഈ രാജ്യം രക്ഷപെട്ടേനെ !!
മറ്റൊന്ന് ഫ്ലക്സ് വച്ചുള്ള കോമാളിത്തരങ്ങളാണ് രാഷ്ട്രീയ പാർടികൾ പരസ്പരം കളിയാക്കാൻ ഉപയോഗിക്കുന്നത് കൂടാതെ ഇപ്പൊ കല്യാണം വിളി പോലും ഫ്ലക്സ് വഴിയാണ് ."സുഹൃത്തുക്കളെ ഞാൻ വിവാഹിതനാവുകയാണ്" എന്ന രീതിയിൽ ചെറുക്കന്റെ വക ഫ്ലക്സ് .ഇവൻ കെട്ടാൻ പോവുകയാണ് എന്ന രീതിൽയിൽ കൂട്ടുകാരുടെ വക ഇങ്ങനെ പോകുന്നു ഫ്ലക്സുകൾ .അത് കൂടാതെ sms അയക്കാൻ കാല് പിടിച്ചുകൊണ്ടു റിയാലിറ്റി ഷോക്കാരുടെ വക ഫ്ലക്സ് .പാലം പണിയാൻ ഫ്ലക്സ് ,പാലം പൊളിക്കാൻ ഫ്ലക്സ് .ഇനി അമ്പലത്തിൽ ഉത്സവം വന്നാൽ ഫ്ലക്സ് പളളിയിൽ പെരുന്നാൾ വന്നാൽ ഫ്ലക്സ് .എന്തിനു മൂത്രമൊഴിക്കാൻ പോയാൽ വരെ ഫ്ലക്സ് ആണ് .
എന്നാൽ ഇതുകൊണ്ടുള്ള ദൂഷ്യ വശങ്ങൾ ആരും ഓർക്കുന്നില്ല .പ്ലാസ്ടിക് പോലെ തന്നെ നശിച്ചു പോകാത്ത വസ്തുവാണ് ഫ്ലക്സ് .ഇത് മണ്ണിൽ കിടന്നാൽ മണ്ണ് നശിച്ചു പോകും .അതുപോലെ പരിസ്ഥിതിയിൽ വളരെ വലിയ മലിനീകരണം ആണ് ഇതുണ്ടാക്കുന്നത് .മഴക്കാലത്ത് വെള്ളം കെട്ടിനിന്നു കൊതുകുകൾ പെരുകാനും ,ഓടകളും മറ്റും നീർച്ചാലുകളും അടഞ്ഞുപോകാനും ഫ്ലക്സ് കാരണമാകുന്നു .വളരെ വലിയ ഫ്ലക്സ് ബോർഡ് റോഡിൽ വെക്കുന്നത് ഡ്രൈവർമാരുടെ ശ്രദ്ധ തിരിയാനും അതുവഴി അപകടങ്ങൾ ഉണ്ടാകാനും കാരണമാകുന്നു .ഫ്ലക്സ് ബോർഡുകൾ റോഡ് കാണാൻ കഴിയാത്തവിധം വെക്കുന്നതും അപകടങ്ങൾ ഉണ്ടാക്കുന്നു .
റോഡ്സൈഡിൽ ഫ്ലക്സ് ബോർഡ് വെക്കുന്നത് സർക്കാർ എത്രയും പെട്ടന്ന് നിരോധിക്കേണ്ടതാണ് .ഇനി അഥവാ ഫ്ലക്സ് ബോർഡ് വച്ചാലും ഇത്ര സമയത്തിനുള്ളിൽ എടുത്ത് മാറ്റാനുള്ള നിയമം കൊണ്ടുവരേണ്ടതാണ് .ദൈവങ്ങളെ ഫ്ലക്സ് ബോർഡുകളിൽ നിന്ന് എത്രയും പെട്ടന്ന് രക്ഷിച്ചില്ലെങ്കിൽ ഇനി പള്ളികളിലും അമ്പലങ്ങളിലും ഭക്തർ ഉണ്ടായിരിക്കുന്നതല്ല .!!!
ചിത്രം :കടപ്പാട് വെബ് 
